Dikarang Chris Bishop
KUCHING, 25 Mei: Kualiti bekal ai di Pelilih Sri Aman meseti diputarka enggau lengkas, pinta Ketuai Parti Tindakan Demokratik (DAP) pampang Sri Aman Leon Jimat Donald.
Berindik enggau nya, Leon ngelalau Perintah Negeri Gabungan Parti Sarawak (GPS) badu bemain politik lalu ngamatka semaya deka nyendia bekal ai beresi ungkup rayat di Undop enggau Bukit Begunan.
“Diatu mengkang nadai bekal ai beresi berengkah ari simpang Batu Lintang nyentuk ngagai Tintingkah enggau Ulu Undop.
“Pia mega nadai bekal ai beresi ungkup rayat di Selepong nyentuk ngagai Lachau, Kara sereta diselampur Balai Ringin,” ku Leon ba program betemu enggau rayat di Rumah Riti, Empadi di Batu Lintang, Sri Aman.
Leon nambah, pemar ke ditapi nya suah disebana peranak Sri Aman alai perintah negeri nengah Opis Menteri Utiliti meseti bekereja mutarka pekara nya.
Ku iya, pengari perintah GPS di Sri Aman udah enda meratka pemaik rayat ngelamatu.
“Ketegal nya, ngena maya diatu rayat milih perintah ke baru manggai ba taun 2021. Perintah Pakatan Harapan ulih nyendiaka semua tu ungkup rayat Sri Aman,” ku Leon.
Ngenang kaul ke sama, Leon madah GPS semina kiruh ngintu pemaik kroni diri tang enda ibuhka pemar rayat.
Nyauka manggai 60 taun GPS (suba Barisan Nasional) udah ngintu Sarawak tang mengkang bekal ai beresi enda diberi ngagai rayat Sri Aman, tandu Leon.
Ba program nya Leon bisi nyuaka bantu (cek duit) ari Sapit Menteri Dagang Dalam Menua enggau Pekara Bebeli Barang Chong Chieng Jen ngagai Riti. — DayakDaily
