BINTANGOR, Jan 18: Ketegal tanah tusur ke nyadi ba tebing bukit besemak enggau rumah sida, peranak Rumah Elly, Jalai Wak Pakan udah ngangauka bomba nyaup sida mutarka penanggul nya.
Tukang pengerembai berita Opis Bomba enggau Penyelamat Malaysia (JBPM) Sarawak madah, pengudah nerima ripot bekaul enggau penusah nya pagi kemari, tiga iku ari Balai Bomba enggau Penyelamat (BBP) Bintangor lalu mansang ngabas palan nya.
“Tanah tusur ke nyadi ba tebing bukit tau ngebap jalai besai nyema nyadi hari ujan ke enda ngengetu.
“Kami ngabas lalu ngelalau peranak rumah panjai ngelingi enggau ke semak ngambika bejimat-jimat maya mansa palan nya maya hari ujan,” ku iya.
Ku iya, Bomba mega bisi ngelekatka kelai ba endur ke nyadi nya. — DayakDaily
