Tambahka pengelandik enggau chara ngiring komuniti — Abang Johari

Datuk Patinggi Abang Johari Tun Openg. — DayakDaily.com file pic

KOTA SAMARAHAN, April 13: Kepala Menteri Datuk Patinggi Abang Johari Tun Openg dekaka chara bejalaika pengawa enggau pengelandik ketuai raban bansa ba renggat baruh diubah setipak enggau gaya ke diatu ti mungkur nguna teknologi.

Ku iya, ketuai raban bansa ke udah mujur ngubah pengelandik ulih nambahka pengarap ati komuniti ke ari baruh pegai iya.

“Lebuh perintah ngatur pekara bejalaika pengawa nya mega ngaul ketuai raban bansa ba renggat ke baruh. Sekali sida deka tauka enggai, ketuai raban bansa meseti nitihka ubah. Kitai untung laban Opis Menteri Pemansang Menua Pesisir enggau Kandang Menua mantu ngelatih ketuai raban bansa di negeri tu.

“Entara chara iya nya nengah Program ‘Sijil Tadbir Urus Desa’ Institut Kemajuan Desa (INFRA) Universiti Kuala Lumpur (UniKL). Asil program nya nengah chairman Komiti Pemansang enggau Pengelikun Genturung Pendiau (JKKK) di Sarawak ulih ngatur pengawa ba kandang menua sida ngena penemu ke manah,” ku iya.

Iya bejaku munyi nya ba Pengerami Nutup Program Infra-UniKL Zon Sarawak di Universiti Malaysia Sarawak ditu kemari.


Sama bisi datai Sapit Kepala Menteri Datuk Amar Douglas Uggah Embas enggau Sapit Menteri Pemansang Menua Pesisir enggau Kandang Menua, Datuk Alexander Nanta Linggi. — DayakDaily