Tambahka penemu ba teknologi betanam betupi

LUBOK ANTU:Kaban Parlimen Lubok Antu, Datuk William Nyalau Badak ngelalau bala pekebun ditu semampai nambahka penemu sida ba teknologi betanam betupi ke pemadu baru.

Ku iya, nengah chara nya sida ulih nambahka penatai pemisi diri enggau pemansut asil ari kebun.

Kelimpah ari nya, iya mega nangkan bala pekebun di sitak nya ngemayuhka guna tanah sida awakka bulih mayuh agi penatai pemisi ari tanah sida.

“Anang semina bepanggai ba utai tanam aja tang sida mega tau nguna tanah nya endur nupi jelu,ikan enggau ke bukai.

“Sida tau nguji ngemayuhka guna tanah sida ngambika ulih ngemansut mayuh agi asil lalu nambahka jalai pemansut penatai pemisi sida,” ku iya.

Nyallau bejaku munyi nya ba pengerami ke diatur di Kaong Ulu empai lama udah.

Bela bisi ngulu pengerami nya, Menteri Muda Betanam Betupi Moden ke mega Kaban Kunsil Nengeri Batang Ai, Malcolm Mussen Lamoh.

Beserimbai enggau pengerami nya, Mussen bisi nyuaka bantu belanja RM200,000 ngagai peranak Kaong Ulu dikena sia ngaga Gerija baru Katolik di genturung pendiau sida.