KUCHING, Jun 12: Parti Pekerja Sarawak (SWP) begulai enggau Sadia deka matau pengawa 11 kompeni ti diberi lisin nanam baru kampung di tanah pemesai 1 juta hektar di Kapit.
Presiden SWP, Munan Laja madah kompeni enda tau sengapa tama lalu ngereja tanah Pemakai Menua (PM) enggau Pulau Galau(PG) enggi rayat di Sungai Bangkit, Katibas Tengah Song.
“Aku ke mega peranak asal menua nya berasai sinu ngenang pengeran sida ngenanka tanah pesaka nitihka penetap undang-undang.
“Utai ke disebut sida (rayat) sigi amat, PMPG sigi biasa kuasa ba undang-undang.
“Kompeni meseti meri basa lalu otoriti meseti neritka undang-undang,” ku Munan nengah surat penerang berita seharitu.
Iya ngansak otoriti mutarka pemar tu enggau manah lalu mulaika pemaik ngagai kededua piak.
Ku iya nambah, atur udah ditetapka ngagai kompeni ke nanam baru kampung tu semina tau ngereja Tanah Nengeri aja.
Munan ke mega Sapit Presiden Sadia madah memorandum ti ngerintaika peneka rayat udah digaga lalu deka disadung ngagai kompeni, otoriti enggau bala ketuai. — DayakDaily
