S’wak komited ngaga 100 sekula dalam setaun

Datuk Patinggi Abang Johari Tun Openg

KUCHING: Kepala Menteri Sarawak, Datuk Patinggi Abang Johari Tun Openg madah perintah nengeri komited ngaga 100 buah sekula dalam kandang setaun dikena mutarka penanggul sekula ti kelalu balat udah buruk sereta tuai di nengeri tu.

Ku iya, nitihka pemadah ari Opis Menteri Pelajar, 1,174 ari 1,456 buah sekula di nengeri tu tau dikumbai udah kelalu balat buruk sereata tuai lalu 183 buah ari nya meseti diganti enggau jampat

Ku iya, pekara tu enda tau enda digaga jampat laban kitai enda ulih nganti agih belanja ari perintah besai ti kelalu lama, tambah mega sekula nya udah enda likun dikena.

“Ngambika juluk tu mujur dijapai, kitai begunaka belanja ari Yayasan Sarawak enggau Bank Pemansang Sarawak (DBOS),” ku iya.

“Aku udah berandau enggau Menteri Besai Datuk Seri Mohd Najib Razak lalu iya udah setuju enggau langgur penemu nya ngambika kitai ngena belanja diri dulu, udah nya baru perintah besai mayar pulai ngagai kitai,” ku iya lebuh ke bejaku ba Pengerami Makai Lemai Begulai Enggau Kepala Menteri Sarawak beserimbai enggau Aum Majlis Kerjasama Kepimpinan Yayasan (MKKY) ke-27.