KUCHING: Menteri Utiliti Sarawak Dato Sri Dr Stephen Rundi Utom madah, endang nyadi juluk ati Sarawak deka eksport mayuh agi kuasa elekterik ari tekad hidro di nengeri tu ngagai menua bukai ngelingi .
Pulau Borneo nyengkaum Sabah, Semenanjung Malaysia, Brunei, Kalimantan Indonesia enggau Selatan Filipina.
Diatu, Sarawak ngemansutka 5,800 megawat kuasa elekterik ari tekad hidro enggau ari dua loji pemansutkuasa arang batu di Sejingkat enggau Mukah.
Bekal kuasa elekterik nya ngelui ari ke guna diri empu lalu laluh kuasa nya tu dieksport.
Sarawak udah eksport 115 megawat kuasa elekterik ari tekad ai di nengeri tu ke Kalimantan Indonesia.
Ku Rundi, Sarawak nengah pengulih sistem pemansutkuasa tekad eleketrik hidro ulih ngasilka nyentuk 24,000 megawat kuasa elekterik.
Tu meri pengelebih ngagai Sarawak nyadi hub kuasa elekterik di Pulau Borneo sereta ngisi peminta menua bukai ke ngelingi.
Ku iya baru, nyerumba taun 2025, 70 peratus kuasa elekterik ti dipansutka di nengeri tu datai ari tekad hidro
Nya kebuah pengawa ngemansutka kuasa elekterik ari utai bukai deka majak dikurangka.
Iya bejaku munyi tu lebuh bejadi Green Tech Talk 2017 di Auditorium CAIS, Kampus Universiti Malaysia Sarawak (UNIMAS) kena Hari Dua tu tadi.
Rundi mega madah, Sarawak Energy Berhad (SEB) deka bulih untung besai jemah ila laban peminta bekal kuasa elekterik ti tinggi ari Indonesia.
