KUCHING, Okt 30: Kepala Menteri Datuk Patinggi Abang Johari Tun Openg madahka Perintah Negeri Sarawak deka ngaduka kediri chara nguna agih belanja RM1 bilion dalam Bajet 2018 dikena ngaga sereta ngemanah sekula repuk sereta tuai di negeri tu.
Iya mega ngarapka perintah besai meri agih belanja nya terus ngagai perintah negeri.
“Terima kasih ngagai Menteri Besai (Datuk Seri Najib Tun Razak) ketegal udah meri agih belanja RM 1 billion nya ungkup ke kena ngemanah sekula ke udah repuk nyengkaum agih belanja ke utai bukai ngagai Sarawak.
“Aku mega minta ngagai menteri besai ngambika pengawa ngaga enggau ngemanah sekula tu dipejalai ba renggat Sarawak, ukai di Putrajaya dikena nyeliahka penanggul birokrasi,” ku iya lebuh bejaku nutup Pekit Worldskills Malaysia Sarawak 2017 di Pusat Konvensyen Borneo Kuching (BCCK) ditu, kemari.
Lebuh ke bejuraika Bajet 2018 kena Hari Lima nyin tadi, Najib ke mega Menteri Wang udah ngungkupka RM1 bilion ngagai Sabah lalu RM1 bilion agi ngagai Sarawak ke tuju ngaga sereta nemanah sekula ti udah tuai sereta repuk nguna Sistem Bangunan Berindustri (IBS). — DayakDaily
