Miri engkeman endur numbuhka zon nadai chukai di S’wak — Teo

Taxes. — DayakDaily.com file pic. // Photo: Pixabay

MIRI, Okt 31: Siti zon nadai chukai patut ditumbuh di Sarawak dikena ngangkatka agi produk dagang temuai di negeri tu laban taun 2020 udah ditetapka nyadi Taun Nemuai Ke Malaysia dalam Bajet 2018 ti dipejuraika Menteri Besai Datuk Seri Najib Tun Razak kena Hari Lima nyin tadi.

Sekretari Besai Gerempung Hotel-hotel Malaysia (Pampang Sarawak) John Teo Peng Yew madahka pasar Miri tau dianggap palan strategik ungkup zon nadai chukai ketegal ke besemak enggau Brunei sereta Sabah.

“Sarawak nguji numbuhka zon nadai chukai ke alai Senadin di pasar Miri engkeman amat digaga nyadi palan nya laban ke semak enggau garis entara menua enggau Brunei,” ku iya madah ngagai Bernama kemari.

Teo madahka mayuh produk ke tau ditukuka enda dichukai baka gari, perengka kena nyumai, entukar enggau barang pemakai.

“Langkawi tau nyadika model ke manah ngaduka zon nadai chukai,” ku iya.

Ke rekod, penyauh Senadin ari Kompleks Kastam, Imigresen enggau Kuarantin (CIQ) Sungai Tujuh ti lebih tiga juta temuai mansa nengah palan nya ninting taun ke semina 20 minit penyauh enti ngena entukar.

Palan nya mega ngerekod penambah pengudah jam operasi dilanjar berengkah ari 1 Sept 2015 iya nya ari 6 pagi ngagai 12 tengah malam dibandingka enggau ari 6 pagi ngagai 10 malam sebedau tu.

Najib ti mega nyadi Menteri Wang maya bejuraika Bajet 2018 madah, Malaysia deka nyadi tuai rumah beberapa atur pengawa antarabangsa ba taun 2020 antara nya baka Sidang Kemuncak Kerjasama Ekonomi Asia Pasifik (APEC), Kongres Dunia bekaul Teknologi Pemadah enggau Aum Ketuai-Ketuai Perintah Komanwel.

Taun Nemuai Ke Malaysia keterubah endar dilanchar kena taun1990 ditangkanka ba taun 1994,2007 enggau 2014. — DayakDaily