SIBU, Julai 5: Perintah Sarawak deka bisi mayuh agi pemansut penatai pemisi dikena ngemansangka negeri tu enti ulih ngetanka hak ngatur kediri minyak enggau gis nengah Ordinan Perlombongan Minyak 1958 (OMO58).
Enti OMO ti dikemendarka nya lalu diteritka kuasa ba Kunsil Negeri (DUN) dalam taun 1958, Sarawak deka bulih mayuh agi penatai pemisi dibanding enggau ke diatu.
Menteri Pengelantang Pendia Komuniti, Orang Indu, Ruang Bilik enggau Pemansang Nembiak Mit, Dato Sri Fatimah Abdullah ngelalau semua kompeni ngelumbung minyak nyengkaum Petronas nitihka prosedur ti ditetap nyengkaum ngulihka lisin operasi bepelasarka OMO58.
Bejaku ba Pengerami ‘Ramah-Tamah Aidilfitri Pertubuhan Kebajikan Islam Malaysia (PERKIM)’ Pampang Sibu, Fatimah ngaku perengkaguna di Sarawak agi jauh tinggal, nya kebuah sigi bisi pematut negeri tu nuntut hak nya setipak enggau Sempekat Malaysia 1963 (MA63). — DayakDaily
