MIRI, Julai 5: Chukai dagang temuai ti diteritka kena Sept 1, 2017 patut diketu ngambika ulih matak mayuh agi penatai temuai ke menua tu.
Sekretari Besai Dipebasa Gerempung Hotel Malaysia (MAH) Pampang Sarawak, John Teo Peng Yew madahka senario industri dgang temuai Sarawak bebida enggau negeri bukai lalu chukai nya meri empas ke enda manah ngagai temuai ari menua tasik ti datai nemuai ke negeri tu laban ungkus pejalai ke Sarawak sigi udah mar.
“Ungkua belanja pejalai ke Sarawak jauh mar agi dibanding enggau ngagai menua bukai baka ke Bali, Bangkok, Hong Kong tauka Taiwan,” ku iya kemari.
Teo madah, mayuh ejensi dagang temuai menua tasik besebana madahkka tambang bilun ke Sarawak kelalu mar, baka tambang ari Kuala Lumpur ke Sibu semina RM1,145 (RM2,000 pulai mansang), dibanding tambang pulai mansang ari Kuala Lumpur ke Bangkok semina RM409.
“Nyadika penanggul ba kami deka nyual Sarawak laban tambang bilun mar, tambah mega enggau Chukai Dagang Temuai sepenyampau RM10, udah tentu majak mayuh bala temuai enggai nemuai ke Sarawak, nya alai kami meseti mutarka penanggul tambang bilun dulu sebedau mikir nambahka agi tating ngagai temuai ke bisi ati nemuai ke Sarawak,” ku iya.
Iya mega madah, 90 peratus temuai ke bemalam ba hotel di Sarawak rayat negeri tu empu, ke ngatur pengawa dagang.
“Enda manggai lima peratus nya orang ari menua tasik, lima peratus agi ari negeri bukai di Malaysia lalu tebal temuai menua tasik ti dikumbai ‘backpacker’ ke diau ba homestay,” ku iya.
Ku iya, chukai 10 peratus ti terit ba temuai menua tadik nadai meri penatai pemisi ke mayuh ngagai perintah tang ngusutka penyampau temuai ti nemuai ke Sarawak.
“Tambah mega kelalu mayuh motel bajet/Inn /inap desa ke nadai lisin di Sarawak lalu premis tu enda ngambi chukai dagang temuai. Tu ngasuh temuai ari menua tasik milih bemalam ba hotel ke nadai lisin,” ku iya.
Kena hari Rua u tadi, Menteri Dagang Temuai, Art enggau Daya Pengidup, Datuk Mohamaddin Ketapi diripot bisi mansutka jaku madahka penyempau chukai sama rata RM10 siti bilik semalam ti dipinta ari temuai ari menua tasik ke bemalam ba hotel enggau palan bemalam ti ngatika diri ke berejista, enda ngeruga penatai temuai ke menua tu. — DayakDaily
