SUPP pechaya diberi peluang bediri minta pilih ba 7 kerusi

Sarawak United Peoples' Party logo.

KUCHING: Taja pan Parti Rakyat Bersatu (UPP) bisi ati deka bediri minta pilih ba sekeda kerusi majoriti China ba kandang pasar, tang Parti Sa’ati Rakyat Sarawak (SUPP) pechaya deka diberi peluang ngarika Barisan Nasional (BN) ba pengawa bepilih besai ti deka diatur sebarang maya.

Nya ukai pekara ke nyelai tang bepelasarka pemutus Kaunsil Besai Barisan Nasional ti baum pun bulan September tu tadi, ke alai formula ngagih kerusi ngagai parti komponen BN nadai berubah.

Ku Presiden SUPP Datuk Dr Sim Kui Hian, nitihka padah Chaiman BN Pusat Datuk Seri Najib Razak: “Semua kerusi asal ke endur sesebuah parti komponen bediri minta pilih nadai berubah.”

Iya madah munyi nya ngagai pemberita ba sebengkah pengerami ditu, kemari.

Ba PRU ke sebedau tu parti nya udah bediri minta pilih ba tujuh kerusi, tang alah ba enam kerusi majoriti China baka di Bandar Kuching, Stampin, Sarikei, Sibu, Lanang enggau Miri.

SUPP semina menang di Serian, kerusi majoriti Bidayuh, nengah Datuk Seri Richard Riot.

Nitihka perati penganalisis politik, pengulih SUPP ngerampas pulai kerusi majoriti China, bepanggai ba pemereti ati enggau UPP ti nadai berebutka kerusi kelimpah ngengkahka chalun ti dikeandal ulih menang sereta dikerindu rayat.