Dikarang Chris Bishop
KUCHING, April 9: Kaban Parlimen (MP) Puncak Borneo Willie Mongin netapka seharitu ngelaika sejarah ngagai peranak Sarawak.
Ku iya, ba bacha keterubah perambu ubah Genteran 1(2) Konstitusyen Federal, aku bisi madahka asai ati ke enda lantang ba sentang bengkah tusun jaku ke dikena.
Berindik ari nya, Willie madah sekeda MP Pakatan Harapan (PH) ari Sarawak enggau Sabah udah madah ngagai Menteri Undang-Undang sereta Putrajaya diak sida enda setuju enggau bacha keterubah nya.
“Pekara nya dibantah ukai ketegal deka ngangkatka diri tauka popular, tang bekait enggau hak enggau pekara ke patut ungkup Ibu Pertiwiku Sarawak.
“Terima kasih ngagai Petara diak pinta ngena leka jaku ke engkeman ari bacha keterubah nya diterima Menteri Undang-Undang enggau Putrajaya.
“Seharitu nyadi siti agi sejarah ungkup peranak Sarawak enggau Sabah alai hak kitai diberi pulai nitihka MA63.”
Asil ari ubah nya ku Mongin nambah, Negeri dalam Federasyan iyanya,
a) Negeri Melayu; Johor, Kedah, Kelantan, Malacca, Negri Sembilan, Pahang, Penang, Perak, Perlis, Selangor, enggau Terengganu; enggau
b) Negeri Borneo; Sarawak enggau Sabah.
Berindik enggau nya, iya ngansak semua MP Malaysia nyengkaum ari Gabungan Parti Sarawak(GPS), Barisan Nasional(BN) enggau PAS nyukung perambu ubah nya malam tu lagi ngambika bulih majoriti dua pertiga.
Bacha kedua perambu ubah Genteran 1(2) Konstitusyen Federal nya dibantaika Menteri Besai Tun Mahathir Mohamad ngilah tengahari tu tadi.
Dulu agi ari tu iyanya kena April 4, 2019, bacha keterubah udah dibantaika Menteri Undang-Undang Datuk Liew Vui Keong. — DayakDaily
