SukSar 2017 dipenyadi Hari Empat tu ba Stadium Perpaduan


KUCHING, Dis 13: Mensia mayuh diperansang sampal datai ngulu pengerami bejadi Sukan Sarawak (SukSar) 2017 di Stadium Perpaduan Negeri Sarawak, Petra Jaya jam 3 lemai 14 Disember tu.

Pengerami nya deka dipenyadi Kepala Menteri Sarawak, Datuk Patinggi Abang Johari Tun Openg ti disereta lebih seribu iku atlit.

Ketuai Pemesai Eksekutif Perbadanan Sukan Sarawak (SSC), Dr Ong Kong Swee madah, program ungkup pengerami nya mungkur pengawa macha ikrar atlit, nikika menira pekit enggau gimik bejadi pekit.

“Kami nesau mensia mayuh enggau kami ngemata pengerami bejadi nya ti deka digulu semua atlit enggau pemesai kontinjen ke bisi ngambi bagi,” ku iya.

Ku iya baru, semua pekit sehari nya deka diatur tumu nyentuk ke jam merarau tengah hari ngambika semua atlit ulih nyeretai pengawa bejadi nya.


Sama bisi datai maya nya ila Menteri Dagang Temuai, Art, Main Asal, Nembiak Lumba enggau Main Sarawak, Datuk Abdul Karim Rahman Hamzah ke mega nyadi penyanding penemu ngatur SukSar.

Majoriti lumba enggau main ti dipekitka ba SukSar 2017 deka berengkah 14 Disember nitihka maya main ti udah ditetap lalu mensia mayuh tau ngulihka penerang bekaul haribulan, jam enggau endur nengah website rasmi https://suksar.sarawak.gov.my/.

Pekit ke berengkah kena 15 Disember iya nya badminton, boling padang, judo, karate, ragbi tujuh sepiak, belanda para enggau nyemerai para.