KUALA LUMPUR: Opis Penagang Ulah Makai Suap Malaysia (SPRM) dipinta mansik nama kebuah lima ngagai enam buah sepital di menua enda mujur digaga tembu ba awak ke ditetap.
Nya enggaika bisi sebarang ulah makai suap ti bekaul enggau pengawa ngaga sepital nya.
Chairman Biro Penyerakup Bansa, Datuk Seri Dr Santhara ba sebengkah penerang madah, beberapa projek ngaga sepital ti dipadah enda mujur ditembu nya ketegal penatai belanja menua ke diatu.
“Sekalika dipelaba projek tu enda ditembu ketegal ulah makai suap, kroni ti tekelalu tauka enda sikar?
“Tentu tetiap projek udah ditemu rega lalu rega ti dibantaika nya tinggi agi ari ungkus ke amat,” ku iya.
Ketegal pengelaun nya, Santhara madahka projek ti besai guna nya enda ulih diasai rayat taja pan udah lama dikemendar.
“Enti sepital tu udah tembu ila, mayuh mega bengkah penanggul ti deka ditapi baka kurang staf ke udah dilatih kelebih agi bekaul enggau lutur pakar sereta ke bukai,” ku iya.
Lebuh ke bejaku ba pengerami nasih tanah ngaga Sepital Cyberjaya dua hari ke udah, Menteri Pengerai Dr S. Subramaniam madahka bisi lima ngagai enam sepital “sakit” ke enda mujur ditembu ba awak ke ditetap ketegal sekeda penanggul, ku iya.
