MIRI, Jan 15: Bala nembiak Sekolah Kebangsaan (SK) Kuala Bok ditu enda ulih besekula laban sekula nya ampuh bah penalam sekaki setengah ti ngujungka sekula nya ditutup sehari tu.
Tukang Pengerembai Berita Opis Bomba enggau Penyelamat Malaysia (JBPM) Sarawak madah, sekolah nya enda beoperasi ketegal tikas ai majak tinggi tambah mega agu ba buding nembiak enda ulih dikena.
Ku iya, ai pagi tu majak niki urung 2 inci dibanding kemari semalam ketegal ujan kenyau ari kemari ke ujan ba kandang ulu sungai.
“Taja pia, nadai pekara ke enda manah diripot nyadi lalu bala staf enggau raban sekula agi nguan sekula nya,” ku iya.
Ku iya, raban Bomba agi beratika gaya tikas ai ba kandang endur ke ampuh.
SK Kuala Bok ngembuan 62 iku nembiak ke bemalam, 12 iku pengajar, 8 iku staf bukai enggau 15 iku ari ruang bilik staf ke gawa di sekula nya. — DayakDaily
