SJK Chung Hua, Undop begunaka bantu dikena ngemanah begunan lama

Leon nyuaka cek bantu RM3,000 ngagai Chang. Bela dipeda Bong (kanan).

Dikarang Chris Bishop

KUCHING, April 17: SJK Chung Hua, Undop di Sri Aman begunaka bantu ngambi ulih dikena ngangkatmanah begunan sekula ke udah lama.

Pekara tu dibantaika Kepala Pengajar, Bong Set Khium ba sesi randau begulai enggau Ketuai Parti Tindakan Demokratik(DAP) pampang Sri Aman, Leon Jimat Donald bedau lama tu tadi.

Randau nya bela digulu Yang Dipetua (YDP) Gerempung Apai Indai enggau Pengajar (PIBG) Mary Jamit enggau raban Lembaga Pengintu Sekula SJK Chung Hua, Chang Poh Chin.

Leon madah randau ke diatur sehari nya patut suah agi diadu ngambika perintah nemu pemar sereta penanggul ke ditapi sekula.

“Randau entara pengari sekula, pengajar sereta apai indai ti ngarika PIBG enggau pengari ari perintah patut suah agi diadu.

“Nengah randau tu polisi enggau bengkah program ke bisi disedia ungkup nembiak sekula ulih diterangka enggau nenak.

“Kelimpah ari nya, pemar enggau penanggul ke bisi ditapi sekula ulih dipadah ngagai perintah,” ku Leon.

Ngarika perintah besai, Leon besemaya deka ngiga belanja ngambi tau dikena nangkup pinta kepala pengajar ti dekaka begunan sekula dikemanah enggau lengkas.

Nitihka penerang Leon, 88 peratus nembiak ke besekula di SJK Chung Hua, Undop ngarika bansa Dayak (Iban).

“SJK Chung Hua Undop udah nempa mayuh nembiak ke nyulut alai nya ukai semina ba pengawa besekula aja tang sida mega ulih bejaku mandarin enggau manah.

“Pengelandik ba jaku mandarin meri pengelebih ngagai sida jemah ila kelebih agi ba maya begigaka batang pengawa,’ku iya.

Leon muji pengawa bala pengajar enggau apai indai sekula nya ti seruran meri peransang ngagai nembiak ba pengawa besekula.

Pelajar nyadi jalai endur mansutka diri ari penyeranta, tandu iya.

Ba randau nya, Leon bisi mega nyuaka cek bantu RM3,000 ngagai Lembaga Pengintu Sekula SJK Chung Hua ke diterima Chang.

Cek nya diberi Sapit Menteri Dagang Dalam Menua enggau Pekara Bebeli Barang ke mega Chairman DAP Sarawak, Chong Chieng Jen. — DayakDaily