Siti komiti deka ditumbuh mansik pematut RTM, Bernama digempung

Gobind Singh Deo

PUTRAJAYA, Jun 29: Siti komiti deka ditumbuh kena Hari Tiga minggu nyin ila dikena mansik enggau silik perambu ti deka ngempungka Radio Televisyen Malaysia (RTM) enggau Pertubuhan Berita Nasional Malaysia (Bernama), ku Menteri Komunikasi enggau Multimedia Gobind Singh Deo.

Ku iya, komiti tu ila ti nyengkaum piak ari mayuh bidang, deka nyerenih sereta berati tetiap tetiap buah runding bekaul pengawa ngempungka dua entiti media nya di baruh opia menteri iya ulih dipejalai.

“Bisi penemu sereta buah runding ti enda sebaka bekaul pengawa begempung tu, nya alai aku deka mansik semua pekara enggau silik. Bisi penemu dekaka Bernama dijadika ungkup sektor berita lalu ngambi tanggungpengawa nya ari RTM.

“Pekara tu nyangka ulih ngurangka ungkus belanja enggau ulih bekelimat lalu ulih ngemanah isi program ke diayanka ba RTM,” ku iya madah ngagai pengarang berita ba pengerami nyambut pengabang opis menteri iya ba Dataran Gemilang, ditu saritu.

Gobind dalam siti program randau enggau The Malaysian Reserve bedau lama ti udah madahka perintah benung berunding deka ngempung RTM enggau Bernama ke siti ari jalai deka ngurangka ungkus belanja.


Ba kenang ti sebaka, Gobind madah RTM diberi timpuh enam bulan dikena ngemaru ngambi bisi mantaika orang baru lalu agresif agi ke tanda sida bebendar matak mensia mayuh.

“Taja pia, nama pan pemutus ti digaga patut dibai ngagai Kabinet dikena ngulihka penemu sereta buah runding ari Menteri Besai tun Dr Mahathir Mohamad.

“Tu berindik ari Bernama suba ditumbuhka ari baruh Akta Parlimen. Nya ketegal, nama pan ubah, patut bisi ubah mega ba undang-undang lalu dibantaika ba Parlimen,” ku iya.

Ba kenang bukai, Gobind madahka Chairman Suruhanjaya Komunikasi enggau Multimedia (SKMM) Tan Sri Dr Halim Shafie enggau Ketuai Operasi Datuk Dr Mazlan Ismail sereta dua iku pemesai tetinggi opis nya udah ngetuka diri gawa kena Hari Satu tu tadi. — DayakDaily