KUCHING, Dis 17: Menteri Pengatur Pengereja Pengawa, Datuk Seri Richard Riot Jaem madahka Sistem Insurans Pekerjaaan (SIP) ti nyediaka penguntung mata duit enggau servis kereja ngawa pengereja pengawa ti nadai agi kereja deka berengkah diterit 1 haribulan Januari taun baru.
Ku iya, semua penyendia ke pekara nya udah dipejalaika Pertubuhan Keselamatan Sosial (Pekeso) ke alai SIP deka berengkah ba haribulan ke ditetap nengah bayar keterubah ari pengaji enggau pengereja pengawa.
“Bayar nya 0.2 peratus ari batang gaji ari pengaji enggau pengereja pengawa.
“Bayar penguntung nya ngagai penerima ke patut dipelaba berengkah kena bulan Januari 2019,” ku iya lebuh bejaku ba Pengerami Krismas ngagai penerima penguntung Pekeso Sarawak di sebuah hotel ditu kemari.
Taja pia ku iya, ngagai pengereja pengawa ke nadai agi kereja ba taun 2018 tau nerima penguntung interim mata duit ungkup timpuh maksimum 3 bulan.
“Penguntung interim nya dipelanja perintah nengah ungkup belanja RM122 juta, ke diberi ngagai Perkeso,” ku iya.
Ngagai orang ti dibuai kereja pengudah taun 2019 ku iya, sida deka nerima bantual maksimum enam bulan, sereta dibantu ari sukut latih pengelandik ari Tabung Pemansang Pengatur Oengereja Pengawa (HRDF), sebengkah agensi ari baruh Opis Menteri Pengatur Pengereja Pengawa.
Ku iya, skim nya udah dikemendar Kabinet enggau Dewan Rakyat, sereta dalam proses ke penudi ngulihka pemendar ari Dewan Negara enggau Yang-DiPertuan Agong.
Ku iya, skim nya ke pemadu manah dikena kompeni ke bangkrap tauka ngemitka operasi mutarka penanggul ketegal betapi enggau tating ekonomi dunya enggau ke bukai.
Ngenang sentang penerang ti dikerembai ti madahka mayuh pengereja pengawa diketu gawa di menua tu, iya madahka nya ‘ berita baru’.
“Enti bisi, kami ba opis menteri tentu dulu nemu.
“Tang kami nadai nerima ripot. Dini sida bulih penerang tu, aku pan enda nemu,” ku iya lagi. — DayakDaily
