Siku orang tuai lenyau dipelaba dianyutka ai deras ba Sungai Julau

Perahu Ukat Abon yang dijumpai.

SARIKEI, Jan 6: Siku orang tuai diripot lenyau pengudah enda pulai ke rumah kenyau ari 11 pagi kemari, pengudah iya ngabas kebun semak enggau Rumah Unsa, Jagoi, Pakan.

Penulung Pengarah Operasi Bomba enggau Penyah Penusah Negeri, Tiong Ling Hii madahka sida nerima kangau urung pukul 4.56 lema kemari ari Indu Opis Polis Pelilih Julau.

“Sebuah kerita 4WD main empat iku raban bomba dianjung ngagai palan nya ari Balai Bomba enggau Penyah Penusah Bintangor, ngumpul penerang tumu sereta ngaga operasi ngiga enggau nyelamat (SAR).”

Ripot tumu ku Ling Hii, melabaka orang tuai nya lenyau ba sungai.

“Taja pia nadai saksi ba palqn ke nyadi tang sida sebilik bisi tetemuka perau iya anyut lalu tesangkut urung 50 meter ari palan nambat perau nya.


“Gari enggau barang iya ditemu agi dalam perau tang selipar iya di tebing sungai endur nambat perau nya.

Ripot polis ba Balai Polis Julau semina digaga pukul 4 lemai, pengudah sida sebilik nya melabaka iya labuh lalau dianyut ai sungai.

Orang tuai nya dikelala enggau nama Ukat Abon,74 taun asal ari Rumah Serit, Tanah Putih, ditu.

“Gaya ai sungai ba endur nya deras sereta bah mimit ketegal ujan. Tu ngeringka teori dipelaba orang tuai nya dianyut ai deras.”

Ku Ling Hii, pengawa ngiga dipejalaika begulai enggau peranak rumah panjai nguna bot.

“Taja pia operasi ditangguh pukul 6.22 lemai kemari sereta deka dipajak baru pagi tu.”