MIRI, Mei 2: Perintah ngungkupka RM69 juta ke pemansang fizikal Sibuti nitihka bagi; RM50 juta dikena ngangkatmanah naik Internet nadai wayar, RM10 juta dikena ngemanah sistem parit enggau entali ai Lambir, RM5 juta agi dikena ngemanahka jematan Bekenu.
Kelimpah ari nya RM4 juta agi dikena nangkir Masjid al-Firdaus Taman Tunku.
Bejaku bejadika Pengerami Sejiwa Senada 2018 Sibuti ti digulu lebih 3,000 iku ba laman Palan Transformasi Menua Pesisir (RTC) Sibuti, Kepala Menteri Datuk Patinggi Abang Johari Tun Openg semaya deka fokus mai pemansang ke mwruan ahi ngagai Sibuti ke pemaik pengidup rebak biak.
Kepala Menteri ti madahka diri ngelala Sibuti kenyau ari taun 1980-an, ari jalai batu nyentuk ke jalai dibelakin, iya madahka deka bang Johari mantu ngemansangka Bukit Peninjau nengah chara ngemajuka tanah 50 hektar nyadi kandang endur berumah enggau betanam betupi.
Dikena ngeringka sada di Parlimen sereta ngemajakka pengawa perintah negeri nuntut hak Sarawak ke majak tusur dalam Sempekat Malaysia 1963, Abang Johari minta pengundi Parlimen Sibuti nyukung chalun Barisan Nasional (BN) Lukanisman Awang Sauni.
Ba pengerami nya, Abang Johari bisi nyuaka chek pampas tanah enggau surat pala tanah Undang-Undang Tanah Negeri disempulang enggau pengawa nyuaka dividen Projek Sawit Estet Mini Kaunsil Pemansang Lembaga Tanah Sarawak enggau Skolarsip Yayasan Sarawak. — DayakDaily
