Setengah juta pekereja teknikal deka diguna dalam kandang 12 taun ke deka datai

Datuk Patinggi Abang Johari Tun Openg

SIBU, Ogos 10: Sarawak begunaka urung 500,000 pekerja teknikal dalam timpuh 12 taun ti deka datai, pia ku Kepala Menteri Sarawak, Datuk Patinggi Abang Johari Tun Openg.

Ku iya, enti suba bidang Pelajar Latih Teknikal enggau Vokasional (TVET) enda dikemerat, tang diatu udah dikemerat.

“Tu siti ari inisiatif ti dikemeratka perintah baru dikena ngangkatka “TVET Empowerment Committee” enggau standard TVET di Malaysia.

“Ungkup Sarawak, TVET bisi dua batang juluk iya nya nyendiaka pengelandik dalam program pemansang modal mensia sereta meri setipikit lalu nyikap rayat Sarawak napi pemar nuju Ekonomi Digital,” ku iya.

Abang Johari bejaku munyi nya lebuh bejadi Pemandang Inovasi enggau Teknologi Sarawak (Saintex 2018 di Universiti Kolej Teknologi Sarawak (UCTS) ditu kemari.

Teks jaku iya dibacha Menteri Dagang Entarabansa enggau E-dagang negeri Datuk Seri Wong Soon Koh. Sama bisi datai Mandal Canselor UCTS Prof Datuk Dr Khairuddin Abdul Hamid. — DayakDaily