Sektor dagang temuai patut beambi ulih nguna teknologi digital

Datuk Patinggi Abang Johari Tun Openg

KUCHING, Mac 10: Sektor dagang temuai Sarawak patut beambi ulih nguna teknologi digital dikena ngangkatka daya besemekih industri nengah chara ngempuru dalam rintai digital global, sereta nambah manah pengulih numbuhka mayuh agi dagang, pia ku Kepala Menteri Datuk Patinggi Abang Johari Tun Openg.

Ketegal nya ku iya, sida patut serius agi beratika strategi dagang digital sereta nguna media sosial sereta telefon mudah alih.

“Maya Sarawak bebendar nguji nyapai status negeri maju, beguna amat sektor korperat nyaup nyendiaka platform ke Sarawak bekunsi pemadah pintar, nyadung inspirasi, nyerungkai peluang dagang lalu ngaga kaul dagang enggau menua ASEAN sereta menua bukai di rantau tu,” ku iya lebuh ngelancharka Forum Perlancongan Digital Gerempung Orang Dagang ASEAN-China kemari.

Teks jaku iya dibacha Menteri Dagang Temuai, Art, Main Asal Nembiak Lumba enggau Main Sarawak, Datuk Abdul Karim Rahman Hamzah.

Abang Johari madahka forum nya tau nyadi platfirm ungkup Sarawak ngepunka ‘perkongsian pintar’ enggau ASEAN serwta menua serantaudikena ngelakuka dagang temuai digital ke pemaik semua.

“Sarawak kayu enggah pengeraja asal lalu agi tubah mayuh diserungkai enggau dikemansang. Nengah aplikasi ‘Travel App’ ti dipenyadi, aku pechaya nya ulih mantu ngerembaika industri dagang temuai negeri tu,” ku iya.

Ku iya, dagang temuai nyadi sektor ekonomi ke majak ngerembai lalu perintah negerj beratka pekara nya.

Ba taun 2017,Sarawak ngerikud 4.8 juta penatai temuai ke mungkur belanja RM 8.58 bilion nyengkaum 7.9 peratus pemansut kasar dalam negeri.

Kami melabaka penatai temuai majak nambah lalu ungkup taun 2018, kami nagit penatai temuai 5.25 juta, ku iya. — DayakDaily