KUCHING, Ogos 15: Sekeda kandang endur di negeri tu udah berengkah bisi sebun asap ti dipechaya datai ari menua sepiak, Indonesia.
Berengkah ari kemari, lebih 300 titik angat ditemu di Kalimantan Barat, lalu bacha indeks pengamah angin (IPU) di Kota Pontianak, udah ngelui ari 100 sereta enda manahka pengerai.
Semua tu diiperchaya bepun ari pengawa nunu ke dikereja di menua nya.
Nyentuk pukul 7 pagi tadi, entara kandang menua ti ngerikod bacha IPU ke tinggi di Sarawak iya nya Mukah (72), Bintulu (69), Sibu (62), Kuching (55) enggau Serian (51).
Mendia mayuh kelebih agi bala nembiak enggau ke bisi penanggul respitori dilalau anang pansut ari rumah tauka enggau ba aktiviti di luar ba jam ke diatu. — DayakDaily
