MIRI, Ogos 1: Sebuah sekula primari ditutup lalu sebuah rumah panjai ampuh bah ngenyit penalam satu meter pengudah ujan bangat enda ngengetu berengkah ari pukul 2 dinihari tadi.
Ketuai Bomba enggau Penyelamat Bomba Miri, Law Poh Kiong madahka riput tu naka pukul 9 pagi tu tadi madahka Sekolah Kebangsaan (SK) Lepong Ajai di pelilih Bakong ditutup pengudah tikas ai manggai 1.5 meter lalu Rumah Panjai Lepong Ajai mega bela ampuh pengudah bilik besai enggau dapur ditama ai.
Siti penusah tanah tusur mega bisi diriput nyadi di Batu 6 Jalai Miri-Bintulu, ku iya ditu tadi seraya madahka ampuh bah ngenyit nya mega bisi nyadi ba sekeda genturung pendiau sereta kandang palan berumahi sini di bandar raya tu.
Ku iya, naka ke diatu kandang endur ke ampuh bah ngenyit iya nya Taman Tunku, Kampung Pujut Padang Kerbau enggau Kem PLKN Sungai Rait.
Ku iya, raban bomba enggau penyelamat diatu benung matau tikas pengelikun ba kandang endur ke baruh. — DayakDaily
