Sarawak nagit nyadi pengeluar No. 1 nenas nyerumba taun 2030

Pineapples. — DayakDaily.com file pic. // Photo: Pixabay

KUCHING, Julai 20: Negeri Sarawak diatu nagit nyadi pengeluar lumur satu nenas di menua tu nyerumba taun 2030.

Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madah, dikena ngemujurka tagit ny, opis menteri iya diatu benung nembuka Indu Pelin Industri Nenas Negeri Sarawak.

“Naka ke diatu, bisi urung 150 hektar tanah deka dikemansang endur nanam nenas nengah chara numpuk ba kandang Beting Maro.

“Bisi 50 hektar ari palan nanam nenas di Beting Maro ari baruh IADA Kalaka-Saribas-Betong.

“Bisi 100 hektar agi ba kandang Sungai Lamun ti udah dikemansang ari baruh Kaunsil Industri Nenas Malaysia kenyau ari taun 2015,” ku iya lebuh ke nutup jurai opis menteri iya di Dewan Kunsil Negeri Sarawak, empai lama.

Opis Menteri nya nengah Opis Betanam Betupi Sarawak mega udah ngemansangka siti pelin ke komprehensif dikena ngaduka aktiviti ngemansut padi di Tanjung Purun, Lundu.

Ku iya, pelin tersebut nya dikena nentuka pengawa bumai dua kali setaun ditanam ba semua kandang endur nya lalu disadang berengka ba maya bumai ti deka datai.

“Siti “model pengurusan’ ke nyerangkung semua aktiviti sepemanjai rentayan ke berega nyengkaum ngintu infrastruktur, ngena tanah ke diteju pia aja, bekal benih ke bekualiti, ngatur ai, ngatur utai tanam sereta mekanisasi ladang sereta pengudah ngetau deka dikena,” ku iya. — DayakDaily