Dikarang Chris Bishop
KUCHING, April 24: Sarawak nyadi negeri keterubah ngemeranka atur ngajar sabjek Sains enggau Matematik nguna Bahasa English.
Menteri Pelajar Dr Maszlee Malik madah pinta ari Menteri Besai Tun Dr Mahathir Mohamad sentang chara ngajar nya udah disetuju Perintah Negeri Sarawak.
“Perintah Negeri udah setuju ngemeranka atur ngajar sabjek Sains enggau Matematik nguna Bahasa English iyanya nangkup pinta menteri besai.
“Sarawak deka nyadi negeri keterubah ngepunka atur tu alai sida deka mantu ngemujur juluk nya.
“Sarawak mega deka mantu matih raban pengajar ngambika sida ulih ngajar sabjek Sains enggau Matematik nguna Bahasa Inggeris,” ku iya.
Maszlee mansutka penerang nya ngagai pemberita pengudah ngadu penemuai kereja ngagai Kepala Menteri Datuk Patinggi Abang Johari Tun Openg di Wisma Bapa Malaysia sehari tu.
Ngenang kaul ke sama, iya madah raban pengajar ke dilatih ba program nya sigi bala pengajar ke ngajar di Sarawak.
Sarawak ku Maszlee nandu udah ngadu inisiatif begulai enggau Opis Pelajar Negeri sereta sekeda universiti di negeri tu.
Iya madah inisiatif nya dikena nentuka raban pengajar ulih ngajar nguna Bahasa English enggau manah.
Menteri Pelajar, Sains enggau Pansik Teknologi, Dato Sri Michael Manyin Jawong ke bela nyempulang penemuai Maszlee madah Sarawak udah ngatur sekeda kus ke bekait enggau juluk nya.
Ku iya, lebih 400 iku pengajar udah nembuka kus ke bekait enggau sabjek Sains, Matematik enggau English.
“Sekeda ari sida tu deka matih raban pengajar bukai jemah ila nitihka pengelandik diri.
“Ba sentang atur nambah pengelandik ba Bahasa English, kitai udah berandau enggau sekeda universiti ngambi tau ngajar bala pengajar kitai,” ku Manyin. — DayakDaily
