KUCHING, Nov 14: Projek bekal karan menua pesisir ti dipejalaika di Rumah Panjang Lawai, Selidong disadang tembu ba suku keterubah taun baru.
Menteri Muda Utiliti, Dr Abdul Rahman Junaidi madah pengawa nyambung bekal karan ke Rumah Panjai Lawai benung digaga diatu.
“Projek Bekal Karan Menua Pesisir (BELB) ke beungkus RM2.7 juta nya deka meri pemaik ngagai 33 isi rumah,” ku iya ba Aum Kunsil Negeri (DUN) ditu kemari.
Iya bejaku munyi nya lebuh ke nyaut tanya Paulus Palu Gumbang (BN-Batu Danau) sentang status ke pemadu baru projek BELB ke Rumah Panjai Lawai, Selidong enggau Rumah Panjai Lembong, Entakong.
Ungkup Rumah Panjai Lembong, Dr Abdul Rahman madahka opis menteri nya deka ngelanggur ngagai Opis Menteri Pemansang Menua Pesisir enggau Kandang Menua (KKLW) ngambika rumah panjai nya dikemeratka dalam rintai ungkup projek BELB taun baru.
Nengah awak nya mega, Paulus bisi betanya sentang pematut Rumah Panjai Lembong disambung karan nengah Program Skim Elektrik Alternatif Luar Bandar Sarawak (SARES).
Dr Abdul Rahman madah, laban rumah panjai nya semina 5 km ari tali grid ke diatu, sambung ngagai tali grid deka dikemerat dulu. — DayakDaily
