KUCHING, Julai 7: Presiden Gerempung Pemaju Pengawa Berumah Sarawak (Sheda) Dr Christopher Ngui madah, bepelasara peneleba ngatur ekspo sereta pemandang bekaul enggau rumah ke sebedau tu, peminta ba rumah ke ulih dibeli manggai 80 peratus dibanding enggau rumah mar sereta manah.
Ku iya, rega rumah ke ulih dibeli iya nya ari baruh RM300,000.
Ku iya, setipak enggaj polisi pengawa berumah Sarawak enggau nasional, Perintah Sarawak enggau Perintah Besai udah ngaga bemacham bansa rumah ke ulih dibeli ngelama tu dikena mantu pemeli dalam raban nya.
Lebuh ke bejaku ba pengerami ngelancharka Ekspo Hartanah Sheda di Borneo Convention Centre Kuching (BCCK) ditu kemari, iya minta Perintah Sarawak beratika industri pengawa berumah nya nengah chara holistik dikena mutarka isu makit ke bisi lubah mimit dalam beberapa taun ke udah.
Ekspo kemari nya udah dipenyadika Kepala Menteri Datuk Patinggi Abang Johari Tun Openg.
Ekspo nya taun tu diseretai 86 bala ti mandang ke datai ari raban ti ngaul diri ba industri reta tanah pengawa berumah. — DayakDaily
