KUCHING, Sept 21: Rumah Asap Tabuan Dayak ti udah dibuka kena 1 Feb, 2018, bisi nyendiaka mayuh macham bansa pemakai asal menua tu kelebih agi pemakai raban bansa Iban.
Entara bansa pemakai ke bisi dijual dia baka babi panggang, pansuh manuk, babi, sayur babas enggau bemacham agi, ku menijar rumah asap Eric Jong.
Ia madahka palan nya bisi nyendiaka 20 iti bansal bejual pemakai, dibuka ari pukul 4 lemai nyentuk ke pukul 12 tengah malam.
Tebal agi orang ke bejual ba rumah asap nya bansa Iban lalu bisi nya ke endang udah diau mendam ba Tabuan Dayak ditu, ku iya.
Siti ari tuju muka palan nya laban deka nyendiaka peluang enggau palan ngagai bansa Iban ngaul diri ba pengawa dagang, ku iya.
“Baka ke ditemu kitai komuniti Iban ke pemadu mayuh diau di Sarawak ditu lalu baka nya di mengeri Kuching sereta di Tabuan Dayak. Nya alai bisi pematut meri peluang ke baka ngagai komuniti nya ditu,” ku iya.
Jong mega madah, dalam timpuh tiga bulan keterubah pengudah palan nya dibuka, bisi mimit orang datai kia, tang udah nya mensia mayuh majak nemu pemisi palan nya, lalu nyentuk diatu dedat belama ditapat mensia mayuh kelebih agi maya ujung minggu.
Ku iya, kelimpah peranak mengeri tu, temuai ari menua bukai baka ari semenanjung, German, Singapura, China enggau ke bukai mega bisi datai kia.
Penatai sida ti bisi dibai bala ari ejen kompeni dagang temuai, lalu bisi mega nya datai kediri kia.
Kelimpah ari bejualka pemakai, Rumah Asap Tabuan Dayak mega bisi ngatur mayuh macham pengerami bukai baka Gawai Dayak, ngiling bidai, ngangauka artis tebilang menua tu datai merindang mensia mayuh ke bisi datai ngagai endur nya, ku iya.
Pengerami nya diatur begulai enggau raban orang ke bejual ba palan nya.
Enti nadai pengerami ke besai, rumah asap nya mega bisi ngauka grup tauka individu datai ngaga ‘busking’ ninting malam ba endur nya.
Berebak enggau nya, siku orang peranak Kpg Tabuan Dayak ti keterubah endar bejual dia kenyau ari palan nya dibuka, Jublin Derai ke beasal ari Jungkal Betong, madahka diri berasai gaga endar ati laban bansa kitai Iban diberi peluang bejual dia lalu ulih nambahka penatai pemisi.
Ku iya, nya peluang ke manah alai bansa kitai ngaul diri ba pengawa dagang lalu anang nangi bedagang.
“Bansa kitai Iban anang nangi ngaul diri ba pengawa dagang lalu besekih nitihka singkang bansa bukai,” ku iya.
Nengah awak nya mega iya ngeransang mensia mayuh ke nadai kalai datai ngagai endur nya, ngambika anang enda datai seraya nguji makai pemakai asal ke bisi dijual ba rumah asap nya, ku iya. — DayakDaily
