KUCHING, Okt 25: Perintah besai enggau perintah nengeri udah setuju besaup ngungkupka belanja sepenyampau RM90 juta dikena mutarka penanggul ai beresi di Sri Aman nyengkaum di Lingga enggau Pantu.
Kerejasama nya deka berengkah ba taun 2019.
Menteri Muda Pengelantang Komuniti Datuk Francis Harden Hollis madah, belanja nya dikena perintah ngaga sereta ngangkatmanah loji ai di Sri Aman.
Iya ke mega Kaban Kunsil Negeri Simanggang madah, 50 juta nya diungkupka perintah negeri dikena ngaga sereta ngemanah beberapa loji ai di Sri Aman nyengkaum di Lingga enggau Pantu.
Ku iya baru, perintah besai nengah Opis Menteri Pemansang Menua Pesisir enggau Kandang Menua, mega bisi ngungkupka belanja RM40 juta dikena ngemujurka projek bekal ai di Undop.
Harden madah munyi nya lebuh dikerandau pemberita pengudah ngulu randau ke diatur Opis Mekal Ai Menua Pesisir (JBALB) Sri Aman, kemari. — DayakDaily
