Dikarang Chris Bishop
KUCHING, Jun 3: Chairman Parti Tindakan Demokratik (DAP) pampang Sri Aman, Leon Jimat Donald madahka pemutus Perintah Negeri ngeluarka belanja RM1 biliun dikena ngaga Jematan Batang Lupar semina bebasauka duit aja.
Ku iya, duit nya ulih dikelimat nengah pengawa ngaga jalai nyambung Sebuyau-Banting-Lingga-Sri Aman-Betong lalu ke Maludam.
“Mudah agi belanja enti ngaga jalai penyambung ari Sebuyau ke Banting lalu udah nya ke Lingga sereta terus ke Sri Aman.
“Ari Sri Aman digaga jematan meraka Sungai Batang Lupar ti deka nyambung ngagai Pelilih Betong alai ari nya ulih disambung ngagai Maludam.
“Endaka pengawa tu begunaka belanja kurang ari RM1 biliun?” ku Leon ba siti randau begulai enggau rayat di Kejatau, Sri Aman bedau lama tu tadi.
Leon pechaya enti jematan meraka Batang Lupar ke nyambung Sri Aman enggau Betong nya digaga, pengawa nya deka ngelengkas pemansang ekonomi di kededua bagi menua.
Rayat ari Banting nyentuk ngagai Betong ku iya nambah deka ngasaika pemaik ba sukut ekonomi alai perintah negeri mega didinga deka ngaga palan penyangkai bilun di Betong.
“Dalam timpuh lebih 50 taun dipegai Gabungan Parti Sarawak (GPS) ke dulu dikelala nengah kangau Barisan Nasional (BN), sekeda kandang endur di Sri Aman baka Lingga ke Banting mengkang nadai jalai alun.
“Perintah Negeri patut merambu program pemansang enggau holistik di Sri Aman enggau Betong sereta kandang menua ulu ke bukai kelimpah ti kelalu meratka kandang tebing tasik,” ku Leon.
Iya enggau nyemetak madah raban ketuai perintah negeri enda kiruh deka nyendia atur penyambung ke manah ungkup peranak ke diau ngelingi Banting.
Tembu randau, Leon bisi nyuaka cek ari Sapit Menteri Dagang Dalam Menua enggau Pekara Bebeli Barang (KPDNHEP) Chong Cheng Jen penyampau RM4,000 ngagai Tr Umbek ari Kampung Kejatau.
Cek bantu ke sama ba penyampau RM2,500 bisi mega diberi ngagai Tr Panggau Dato Awang Raweng. — DayakDaily
