RM1 bilion ungkup projek Grid Ai Negeri — KM

Water. — DayakDaily.com file pic. // Photo: Pixabay

KUCHING, Jan 23: Perintah Negeri Sarawak nyendiaka belanja RM1 bilion ungkup mekal ai beresi ngagai peranak menua pesisir dikena ngaga projek Grid Ai Negeri.

Kepala Menteri, Datuk Patinggi Abang Johari Tun Openg madah, keterubah tu perintah negeri udah nyiri konsultan mansik sekalika ulih mekal ai ari tekat Batang Ai ngagai Tanjung Manis ari baruh renggat keterubah projek nya.

Ku iya projek nya deka dipejalaika berenggat laban nguna belanja ke besai lalu iya nyangka nya deka tembu dalam timpuh dua taun.

Iya bejaku munyi nya ngagai pemberita pengudah bejadi Aum Besai Pengari Parti Pesaka Bumiputera Bersatu Sarawak (PBB) Zon 4 di Dewan Kompleks Islam, Bangunan Majma Tuanku Abdul Halim Muazam Shah diu kemari.

Abang Johari ke mega Presiden PBB madah, empat tekat ai besai ti diempu Sarawak, iya nya Batang Ai, Bakun, Murum enggau ke dudi tu ila tekat ai Baleh, deka dikena mekal ai beresi ngagai peranak pesisir nitihka zon.

Ku iya, bekal ai ari tekat nya mega deka dikena mantu sektor betanam betupi ba sekeda endur di pesisir negeri ti amat bepanggai ba pemansut ai ke chukup ungkup utai tanam sida.

Ku iya, pengudah renggat keterubah Grid Ai Negeri dipejalaika, fokus mekala ai beresi ngagai menua pesisir deka beralih ngagai bagi utara Sarawak.

Zon 4 PBB diarika enam pampang iya nya Sadong Jaya, Simunjan, Gedong, Sebuyau, Lingga enggau Beting Daro. — DayakDaily