![alexandernanta](https://i0.wp.com/dayakdaily.com/wp-content/uploads/2017/10/alexandernanta-e1568626458764.jpg?resize=400%2C566&ssl=1)
SELANGAU, Mac 27: RISDA Negeri Sarawak nerima agih belanja RM20.7 juta ke tuju Nanam Baru Getah ke Getah Diatu ba tanah pemesai 2,000 hektar enggau ke tuju Nanam Baru Getah ke Getah Bejurut ba tanah pemesai 3,564 hektar.
Penyampau nya sebagi ari agih belanja sepenyampau RM158.3 juta ungkup program Nanam Baru Getah ke Getah (TSGG) ba kandang endur ke mungkur pemesai 54,057 hektar di serata menua.
Sapit Menteri 1 Pemansang Menua Pesisir enggau Kandang (KKLW), Datuk Alexander Nanta Linggi madahka penyampau nya sebagi ari ungkup belanja sepenyampau RM388.6 juta ngagai RISDA ari baruh Atur Pemansang Malaysia Lumpar ke-11 ke program pemansang di serata menua taun tu.
“Opis Risda Bagi Menua Sibu udah nerima agih belanja nya sepenyampau RM12 juta lke alai RM5.36 juta dikena ngemujurka program Nanam Baru Getah ke Getah Diatu ba tanah 550 hektar enggau juluk Nanam Baru Getah ke Getah Bejurut ba 749 hektar tanah,” ku iya.
Iya bejaku munyi nya ba pengerami bejadika Depo Ngumpul Getah sereta Muka Palan Nangkal Agropolitan Nanga Sekuau ditu ti dilancharka Menteri ba Opis Menteri ke mega MP Selangau, Datuk Joseph Entulu Belaun.
Sentang projek Agropolitan, Nanta madahka nya integrasi program pemansang ti nagit munaska penyeranta lalu nyungkak tikas pengidup enggau kualiti peranak menua pesisir ti nyengkaum tiga batang komponen iya nya fizikal, ekonomi enggau modal mensia.
“Agropolitan Nanga Sekuau siti ari model program ari baruh komponen ekonomi ke alai Risda Plantation Sdn Bhd Bhd nyadi ejen nejalaika pengawa ti udah dipilih RISDA ngemansangka nya,” ku iya.
Bisi 483 peranak udah nyain sempekat enggau Lembaga Pembangunan dan Lindungan Tanah (PELITA) Sarawak ngambika ulih nyeretai projek Agropolitan Nanga Sekuau ti fokus ngagai pengawa nanam getah.
Ku Nanta, pengawa muka palan nangkal nya di Nanga Sekuau nya mandangka pun getah Agropolitan Nanga Sekuau udah stau ditangkal pesereta.
“Orang ke nangkal getah nya deka dipilih ari raban pesereta ke bisi mandangka pengerindu lalu deka diberi Risda Plantation Sdn Bhd latih ngambika ulih ngenataika jalai pemansut lebih ngagai bala pesereta,” ku iya.
Berebak enggau nya katanya, palan depo ngumpul asil getah Sekuau ti udah digaha ngena ungkus RM40,000 deka nyadi palan endur nugungka asil getah skrap ti deka dijual.
Untung beresi ari nyual getah nya deka diserah RISDA ngahai PELITA ke lalu dividen ngagai pesereta Agropolitan Nanga Sekuau. — DayakDaily