Sitak Saratok tetap diempu PDP — Tiong

Datuk Seri Tiong King Sing

SARATOK, Mac 27: Kerusi Parlimen Saratok tetap diempu Parti Demokratik Progresif (PDP).

Presiden PDP Datuk Seri Tiong King Sing madahka Chairman Barisan Nasional (BN) Sarawak Datuk Patinggi Abang Johari Tun Openg ke mega Ketua Menteri ngamatka pekara nya ba aum BN Sarawak di Kuching kena Hari Lima nyin tadi.

Ku Tiong, PDP udah nganjung rintai nama tiga ku chalun ngarika PDP ba kerusi Saratok nediri minta pilih ba Pengawa Bepilih Besai Ke-14 (PRU14).

Taja pia ku iya, Chairman BN Pusat Datuk Seri Najib Tun Razak ke mega Menteri Besai deka milih siku chalun ti nyentuk ke diatu mengkang dilalai nama.

Bejaku ba Pengerami Ketuai Begulai Enggau Rayat di Rumah Dana Anak Embuyan, Temudok, Krian, Tiong MP Bintulu mega minta parti komponen BN kelwbih agi ba sitak Parlimen Saratok negapka kerejasama dikena nentuka BN menang ba sitak nya.


Tiong madahka PRU14 ke sekali tu mar agi ari PRU ke sebedau tu, nya alai iya minta raban BN bekerejasama sereta chakal agi gawa ngambika ulih menang ba PRU ke sekali tu.

Tiong nandu madahka leka jaku Sarawak ditingkil ari pun nama parti nya ngambika PDP ulih muka pampang di Johor enggau Selangor ke lalu meri peluang ngagai rayat Sarawak di Semenanjung nyeretai PDP.

Isu ngempu Parlimen Saratok nya pansut lebuh penyandang sitak nya Tan Sri William Mawan Ikom ti udah menang ba kerusi nya nyadi chalun terus BN maya PRU13 ba taun 2013 ngaku udah nyadi kaban Parti Pesaka Bumiputera Bersatu (PBB) kenyau arj taun 2016. — DayakDaily