KUCHING, Nov 19: Siti ripot polis digaga Sekretari Politik Kepala Menteri Sarawak lemai kemari pasal komen siku netizen ke mejal deka munuh Kepala Menteri Sarawak, Datuk Patinggi Abang Johari Tun Openg.
Komen digaga siku netizen ke dikelala enggau nama Gerard Hie dalam status ke diempu Sarawak For Sarawakian S4S (Sarawak Liberation Movement) SLM.
Netizen nyaut dalam status akaun nya ke alai iya bisi nulis: “Setelah Sarawak Keluar Malaysia, Apakah Perubahan yg Kitak maok”.
Ku Sekretari Politik nya, iya tebacha WhatsApp ti dikirum bakih iya sentang komen Gerard Hie ke terubah iya nulis “Jatuhkan Parti BN”, nangkanka nya lalu nulis “bunuh Abang Jo” dikena nyaut tanya bakih iya.
Ku iya, ripot polis nya digaga ngambika tasat dipejalaika ba individu nya laban ngembuan niat mejal deka munuh ketuai negeri tu.
Ripot polis digaga ba Balai Polis Gita jam 5.05 lemai kemari ke alai iya disempulang tiga iku agi Sekeretari Politik Kepala Menteri Sarawak.
Ketuai Nasat Pengawa Jai Negeri, Datuk Dev Kumar ngenukuka ripot polis pasal isu udah diterima di Balai Polis Gita jam 5 lemai kemari.
“Kami benung nasat ari baruh seksyen 507 Kanun Keseksaan enggau Seksyen 233 Akta Komunikasi enggau Multimedia lalu ngelala identiti pengempu akaun facebook nya,” ku iya. — DayakDaily
