PUTRAJAYA, Sept 4: Rintai kaban Komiti Khas Kabinet ti nyerenih sereta nyemaka Sempekat Malaysia 1963 (MA63) deka dipadahka pengudah dikemendarka Kabinet ba raban menteri ke deka datai.
Menteri ba Opis Menteri Besai (Undang-Undang), Datuk Liew Vui Keong madahka siti memorandum sentang komiti nya udah dianjung ngagai mayuh bengkah opis menteri nyengkaum perintah negeri Sabah enggau Sarawak ngambi ngenataika perambu tauka meri timbal.
“Naka ke diatu, semua mujur dipejalai nitihka perambu,” ku iya ba sebengkah penerang kemari nyebut pasal status komiti nya ke diatu.
Ku Liew, atur mulaika hak Sabah enggau Sarawak baka ke dalam MA63 siti ari lima batang pekara ari baruh manifesto Pakatan Harapan.
Ku iya, raban komiti nya ba renggat ke tinggi diarika ketuai tetinggi ari Semenanjung Malaysia, Sabah enggau Sarawak ke ngembuan penemu sereta pengelandik sentang MA63. — DayakDaily
