KUCHING: Dua bengkah produk ari Sarawak, buah rian musang king ditukar nama nyadi “Sarawak King Durian”, lalu ikan empurau diberi nama “Ikan Emperor” enti tama ngagai makit di menua China
Kepala Menteri Datuk Patinggi Abang Johari Tun Openg madah perambu ngubah dua bengkah produk nya ngagai brand kediri empu dikena mandangka kededua produk nya asal ari nengeri Sarawak tu.
Ku iya, kebuah nukar nama “empurau” ngagai “emperor” laban bisi sekeda rayat China mar nyebut nama ikan empurau nyentukka sida nyebut nya nyadi “emperor”.
Abang Johari madah munyi nya lebuh ke ngulu pengerami Penumbuh Ke-68 People’s Republic Of China kena Hari Tiga tu tadi ke bela digulu Konsulat Jeneral China di Kuching Fu Jijun, ketuai enggau temuai bukai.
Ku iya, leka jaku “emperor” semak agi enggau rayat menua nya laban sida kala bisi emperor.
Kelimpah buah rian enggau ikan empurau, Sarawak mega merambu nambahka eksport pemakai rumpas enggau bungai eksotik ke China.
China diatu beranakka puku RM5 bilion di Sarawak.
Eksport barang Sarawak ke China beungkus RM6 bilion setaun nyengkaum gis asal lela, minyak sawit enggau produk bepelasarka kayu.
