MIRI, Jun 3: Bala temuai diatu dalam timpuh dua bulan tu deka ngasaika rega suwa bilik hotel ke bisi bintang ke murah agi berindik ari status nadai chukai maya ke diatu sebedau Chukai Jual enggau Servis (SST) diteritka berengkah ari Sept 1.
Sekretari Besai ti Dipebasaka Gerempung Hotel Malaysia (MAH) Pampang Sarawak, John Teo Peng Yew madahka sekeda hotel ke betikas bintang di Sarawak diatu bisi meri rega suwa ke murah agi nengah anggar diskaun entara enam nyentuk 16 peratus pengudah Chukai Barang enggau Servis (GST) diketu kena Jun 1 tu tadi.
“Ya, kami ngurangka semua rega baruh agi enam peratus,” ku iya kemari seraya madah naka ke diatu, pekara nya mujur dipejalaika sereta nadai sebarang teknikal.
Ku Teo, kelimpah nukar rega suwa bilik, pengempu hotel mega patut ngubah rega menu enggau mesin juruwang sereta sistem akaun ungkup opis.
“Semua nya meseti digaga berengkah ari 11.59 malam kena Mei 31, 2018 nyentuk ke hari siti, ambis nadai begunaka timpuh enam jam nembuka nya ungkup hotel betikas tiga tauka lima bintang ti ngembuan ambis nadai 200 bilik, coffee house enggau restoran ke manah,” ku iya. — DayakDaily
