KUCHING, Jun 2: Perintah Pakatan Harapan dalam manifesto sida iya ba pengawa bepilih besai Ke14 sebedau tu besemaya deka nambahka penyampau royalti petroleum ngagai Sarawak enggau Sabah ngagai 20 peratus tauka penyampau ke sebaka enggau nya.
Ku manifesto nya, nya siti ari chara magi asil petroleum enggau manah agi.
Penyampau royalti ti diterima kedua-dua negeri nya diatu iya nya 5 peratus.
Dalam beberapa taun ke sebedau tu, bala ketuai enggau rayat di Sabah enggau Sabah nuntut ngambika penyampau nya ditiki ngagai urung 20 peratus.
“Nya awakka Sabah enggau Sarawak ulih ngempu mayuh agi tanggungpengawa ba belanja pemansang,” ku manifesto Pakatan Harapan.
Agih belanja ke besai agi mega deka diberi ungkup bekal ai beresi enggau elektrik ngagai kandang menua ke setengah pasar enggau pasar.
Elimpah ari nya ku iya, Perintah Pakatan Harapan mega deka ngaga jalai alun enggau Jalai Besai ti nyambung pasar mit enggau pasar di serata negeri, kelimpah nyeruri jematan enggau jalai alun ke rusak.
Diatu oengudah Pakatan Harapan menang ba pengawa bepilih besai ke-14 kena 9 Mei suba, rayat Sarawak ngarapka perintah nya ngamatka semua semaya. — DayakDaily
