Rayat Sarawak diperansang ngaga ripot polis ngelaban Petronas

Dominique Ng. — file pic

KUCHING, Jun 9: Ex-Kaban Kunsil Negeri Padungan, Dominique Ng meransang rayat Sarawak ngaga ripot polis ngelaban Petornas ke deka minta ngempu penuh minyak enggau gis Sarawak.

Ku Ng, chara nya dikena mandang pengeringat rayat Sarawak ngagai Petronas bekaul pinta undang-undang sida ngelaban Sarawak.

“Rayat Sarawak ke patriotik patut ngaga nya di semua pasar enggau mengeri,” pia ku Dominic madah ngagai DayakDaily pagi tu tadi.

Ku Ng, nya nyadi kes laban minyak enggau gis nya diempu Sarawak, ukai Petronas lalu nya kebuah rayat Sarawak patut nyaga pengeraja asal ke ditemu di negei tu.

“Kitai tau ngaga ripot polis ngelaban Ptronas ketegal sida nguji enchuri pengeraja asal negeri kitai ke chukup berega nengah PDA (Akta Pemansang Petroleum 1974),” ku Ng ke mega siku luyar.


Ku Ng, sigi bisi pematut rayat Sarawak mgaga nya laban PDA nya “ultra vires” (ngelui ari kuasa undang-undang) konstitusyen.

“Nya meh kebuah PDA dikemendar dalam parlimen taja enda kala dipejurai dalam Aum Kunsil Negeri,” ku Ng nimbal berita ke alai lapan iku di Miri udah ngaga ripot polis ngelaban Petronas kemari.

Petronas udah ngenataika fail sebedau Kort Tinggi ngenukuka PDA nyadi undang ke engkeman ungkup industri petroleum di Malaysia.

Pekara nya deka ngemujurka Petronas ngempu kuasa ekslusif ba pemansut ba pengemun industri di Malaysia nyengkaum di Sarawak.

Petronas nengah penerang ke dikeluarka nena Jun 4, pechaya nengah pemendar ke diberi Kort Tinggi mantu nentuka sida bisi hak enggau penuduk ari baruh PDA.

Petronas mega madah tetap deka nyukung juluk Sarawak ke deka ngaul diri ba industri minyak enggau gis tang meseti dalam kandang langkar PDA. — DayakDaily