JOHOR BAHRU, Mei 6: Pengawa nyiri Ketuai Raban Bansa Sarawak di Pasir Gudang ngelaika Perintah Negeri Johor ngaku guna ba raban bansa Sarawak ti nyaup ngemansangka ekonomi enggau rayat Bansa Johor.
Menteri Besar Johor Datuk Seri Mohamed Khaled Nordin madah, pengawa ngaga Pasar Borneo mega kelai penyiru perintah negeri ba peminta rayat Sarawak ti diau mendam sereta gawa ba kandang menua Pasir Gudang.
“Kami udah nyiri siku Ketuai Raban Bansa lalu kami deka nambahka pangku pengawa nya laban perintah negeri ngaku pemesai guna raban bansa dalam kandang menua kitai,” ku iya lebuh bejaku program ‘walkabout’ di Pasar Borneo, di Taman Rinting, ditu kemari.
Tambah iya, rayat Sarawak mega entara penyukung kuat perintah Barisan Nasional (BN) di Pasir Gudang enggau pengereja pengawa ke beguna amat dalam kandang Pasir Gudang.
“Aku bisi dipadah parti chura bukai bisi datai kitu nguji ngambi ati orang Sarawak tang orang Sarawak enda milih chura bukai kelimpah ‘biru tuai’.Tu ketegal kaul kitai chukup rat lalu mayuh orang Sarawak udah diau mendam ditu lalu meri sukung ngagai aku enggau BN.
“Nya alai aku minta rayat Sarawak terus enggau kiytai dalam BN sama ngemansangka ekonomi negeri, ukai semina ke kita tang bala anak sida ti diada ditu lalu nyadi orang Johor,” ku iya.
Iya nangkanka nya lalu ngawakka diri urung setengah jam meda barang enggau pemakai eksotik ti dijual di Pasar Borneo kelimpah begulai enggau orang ke bejual sereta ti datai bebeli barang ngagai pasar nya. — DayakDaily
