Dikarang Chris Bishop
KUCHING, Mei 5: Ubah politik ke nyadi maya ke diatu nagih peranak negeri tu negika hak Sarawak, ku Kaban Kunsil Negeri (ADUN) Pantai Damai Dr Abdul Rahman Junaidi.
Iya ke nyadi Menteri Muda Bekal Lektrik Menua Pesisir mega madah peranak Sarawak meseti meretika semua hak-hak ke udah disetuju maya numbuhka Malaysia ba taun 1963.
“Diatu kitai, kelebih agi Sarawak napi ubah besai ba dunya politik.
“Ubah tu nagih kitai sama bela mereti lalu negika hak Sarawak ke udah disetuju dalam Sempekat Malaysia 1963 (MA63).
“Bisi 18 pekara ke disetuju piak ke sama bela numbuhka Malaysia dalam sempekat nya,” ku iya.
Dr Abdul Rahman mansutka jaku nya rambau bejadi Licha MA63 Renggat Parlimen Santubong ke diatur di Palan Aum Penview(PCC) Demak ditu, seharitu.
Ba pengawa nya, Kaban Parlimen(MP) Santubong Dato Sri Wan Junaidi Tuanku Jaafar bisi mantaika Licha ‘Hakikat sebuah Persekutuan: Mulanya Disini’.
Ngenang kaul ke sama, Dr Abdul Rahman madah kenyau MA63 disain ba taun 1963, enggau enda diasai hak-hak Sarawak nya majak lenyau lelubah.
“Mayuh pekara ke nyadi udah enda ditemu kitai, baka ke asil ari minyak enggau gis Sarawak.
“Akta Pemansang Petroleum 1974 udah ngambi asil minyak enggau gis ari kitai lalu tu mih entara sekeda pekara ti deka diputarka,” ku iya.
Ba aum pengarang berita tembu mantaika licha, Wan Junaidi netapka kuasa ngintu tauka nentuka kuing Sarawak enda ulih diberi ngagai piak ari Semenanjung Malaysia.
Ku iya, hak Sarawak sigi udah disetuju dalam MA63 alai sekeda nya udah majak lenyau lalu bisi mega sekeda sigi enda kala diberi.
“Enti kitai (Gabungan Parti Sarawak) alah ba pengawa bepilih negeri ti deka datai, kuasa merintah Sarawak deka dipegai Perintah Besai.
“Reti nya, semua pekara ke bekait enggau hak Sarawak deka nadai ayan agi,’ku Wan Junaidi.
Iya mega madah enti Perintah Besai enda meri hak ke patut diempu Sarawak tauka hak nya dilanggar sekeda piak, pekara nya tau dibai ngagai kort.
Bela datai ADUN Demak Laut Dr Hazland Abang Hipni enggau ADUN Tanjung Datu Datuk Amar Jamilah Anu. — DayakDaily
