Randau Tanah Adat Bansa Asal di Sibu Hari Enam tu

Julius Enchana

KUCHING, Jan 23: Parti Bansa Dayak Sarawak Baru (PBDSB) Sitak Tengah deka ngatur randau tanah adat bansa asal (NCR) kena Januari 26, Hari Enam tu.

Randau nya deka diatur di Indu Opis PBDSB Sitak Tengah berengkah jam 9 pagi nyentuk ngagai 3 lemai.

Nitihka penerang Chairman PBDSB Sitak Tengah, Julius Enchana, randau nya deka bejuraika pekara ke bekait enggau tanah NCR sereta pemar ke ditapi peranak asal ba isu tanah.

“Randau nya ila deka bejuraika sentang ubah undang undang tanah ti udah digaga ba Dewan Undangan Negeri (DUN) Sarawak taun nyin kemari.

“Kitai mega deka bejuraika sentang empas PL, politik pemansang enggau tikas pusin tanah NCR,” ku Julius.


Iya nambah, keretas jurai sentang kes tanah ke bisi udah nyadi deka mega dikerandau enggau bala penyereta program maya nya.

Tanggungpengawa pengempu tanah NCR sereta pemesai guna nanda adan tanah bela deka dipekunsi, tandu Julius.

Program ngundang tiga iku pengelicha iya nya, Christopher Sawan Jiram, Mathew Jeluing enggau Bobby William.

Naka ke seharitu, lebih 150 iku orang udah ngerijista diri ngulu program.

Bala penyereta nya datai ari Sibu, Katibas, Pasai, Ulu Entabai, Kanowit, Kapit, Miri, Sri Aman, Kuching, Betong, Saratok enggau menua bukai.

Presiden PBDSB Cobbold John Lusui disadang datai ngulu program.

Berindik enggau nya, Julius ngelalau sapa ti bisi bepenanggul ba pekara tanah tau ngenatai ka diri maya tu ila. — DayakDaily