SIBU, April 18: Raban Indu Parti Bumiputera Bersatu (PBB) deka chakah agi gawa nyadi siti tim ke tegap begulai enggau pampang indu parti komponen Barisan Nasional BN ke bukai nentuka juluk deka menang ulih dijapai ba pengawa bepilih besai ke-14, Mei 9 tu ila.
Ketuai Indu PBB Dato Sri Fatimah Abdullah madahka juluk nya ukai semina ngetanka 25 kerusi Parlimen BN di Sarawak, tang mega ngambi pulai empat kerusi ke diempu penyakal ke sebedau tu.
“Empat kerusi parlimen ke ditagit iya nya Sibu, Sarikei, Stampin enggau Miri. Ngambika juluk nya ulih dijapai, tetiap iku kaban pampang meseti chakah gawa enggau peneka ati diri ke pemaik Sarawak enggau negeri tu,” ku iya ba program ngaul mensia mayuh Kunsil Besai Pampang Indu PBB ditu kemari.
Fatimah ke mega Menteri Pengelantang Komuniti, Orang Indu, Ruang Bilik enggau Pemansang Nembiak Mit meransang pampang nya chakah bejalaika pengawa nambahka penyampau raban PBB ba semua 1,565 ranting parti nya di serata Sarawak.
Klimpah muka kaunter endur ngerejista ba tetiap pengerami ke diatur parti nya, Raban Indu PBB mega dipinta ngerejista diri sebilik ke udah chukup umur nyadi kaban parti nya kelimpah ngetanka kaban ke udah bisi ngambika enda pansut ari parti. — DayakDaily
