KUCHING, Julai 8: Parti Bansa Dayak Sarawak Baru (PBDSB) kemari mujur numbuhka protem komiti Cabang Pasai Siong ba sebengkah aum ti bepalan ba Rh Sebastian Ongoh, Sg Pasai, Ulu Teku di Sibu.
Ba aum tu, Anjie Seli ke mega Sekretari PBDSB Pampang Sibu ke mega siku ari Kaban Kunsil Besai udah dipilih nyadi Ketuai Cabang.
Pengawa Sapit Ketuai Cabang dipangku Sarini James Laju, Sekretari Cabang dipangku Lawrence Mac Phil Dris lalu Annie Sagieng dipaduka nyadi Tukang Wang Cabang.
“Asil ari aum tu deka dibantai maya aum kunsil besai ila. Kami peranak Pasai Siong deka berambis tulang nyukung sereta negapka baru parti Dayak baka ti dulu suba,” ku Anjie.
Ngenang pekara ti bekaul, Anjie mega madah urung 200 nyentuk ngagai 300 iku peranak menua Pasai udah ngerejister diri nyadi kaban PBDSB.
Berindik ari nya, Anjie mega ngansak bala mayuh anang sanggu ngerijister diri nyadi kaban parti.
“Aku kala udah enggau ngayuh ke perau orang, tang kitai semina ke sengayuh orang.
“Maya perau sangkai, anang ke ngasuh kitai bekuli ngangkat ke barang, tang kitai Dayak ditikau ke orang ke ai alai ngasuh kitai kekapa dalam politik,” ku Anjie nambah.
Beserimbai enggau nya, presiden parti, Bobby William madah kediri berasai temegah ati ke pengeransing bala kaban parti ngerembai ka parti tu ba tikas ke abis baruh.
“Tu meh kedeka aku. Aku deka ke bala kaban parti bekerja begulai enggau aku. Ukai gawa ke aku. Aku ngarap ka PBDSB deka nuduk ka chalun ba Bawang Assan ila,” ku Bobby.
Ngenang pekara ke sebaka, Chairman PBDSB bagi menua Sibu, Julius Enchana mega meri pengaga ati ngagai Dayak menua Pasai Siong ti udah nemu tuju sereta angkun ke parti Dayak.
“Taun nyin suba maya aku mangku pengawa Chairman Sitak Tengah mayuh udah menua ditujah kitai. Taun tu kitai negap ke agi singkang kaki kitai,” ku Julius ke mega Seketeri Besai parti.
Ba aum Kunsil Besai apin lama tu tadi, tiga iku Mandal Presiden udah dipadu ka mangku pengawa nyadi Chairman Sitak Menua, ke alai, Adman Jubang dipadu ka nyadi Chairman Sitak Utara Sarawak ke nyengkaum Limbang, Lawas, Miri, Bintulu enggau menua Orang Ulu.
Menua Sitak Tengah Sarawak dikemata ka Mejar (B) Moses Ripai ke nyengkaum Sibu, Sarikei, Kapit, Belaga, Selangau, Kanowit, Julau Pakan enggau Saratok.
Menua Sitak Selatan dikemata ka Dr Bego Sepop ke nyengkaum menua Kuching, Serian, Sri Aman nyentukka Betong. — DayakDaily
