Projek Teh Gaharu ngenataika pemisi tambah ngagai Peranak Rh Manggat, Batang Ai

Raban volunteer begambar bebala mayuh.

Follow and subscribe to DayakDaily on Telegram for faster news updates.


KUCHING JULAI 8: Asil keterubah penyampau 80 kilogram daun gaharu udah diketau ba projek Teh Gaharu Menyang di Rh Manggat, Batang Ai di Lubok Antu.

Projek nanam gaharu tu nyadika projek pemungkal Opis Kampung Sarawak(JHS) lalu dikemujur nengah kerejasama kompeni Aquilaria Plantation(Sarawak) Sdn Bhd sereta peranak Rh Manggat.

Penyampau 40 iku penyereta ari Institut Pematih Pengajar (IPG) Kampus Batu Lintang, IPG Kampus Darul Aman Kedah sereta IPG Kampus Teknik Negeri Sembilan bela begulai enggau peranak Rh Manggat ngetau daun gaharu ba program volunteer nya.


Suliman(kiba) begulai enggau penyereta ari IPG sereta peranak Rh Manggat ngetau daun gaharu.
Dr Lim meri penerang sentang pun gaharu di Menyang Taih.

Nitihka penerang Pemantu Direktor JHS Suliman Jamahari, 14,000 pun gaharu udah ditanam di Menyang Taih kenyau bulan November 2016.

Ku iya, tuju projek iya nya dikena ngintu pemaik pengidup jelu mayas di kampung kandang endur Ulu Menyang.

Projek nerima sukung ari World Wildlife Fund for Nature alai gempung nya ngeluarka belanja dikena meli paung pun gaharu.

“Projek deka nyaup nambah penatai pemisi sereta ngangkatka ekonomi peranak Rh Manggat alai daun gaharu deka diproses nyadi teh gaharu.

“Dianggar tetiap seikar tanah ulih ditanam 800 pun gaharu lalu ngenataika RM2,000 tetiap kali diketau,’ku Suliman.

Projek mega dikelala nengah “The Beginning of Journey’ lalu netapka juluk nanam 30,000 pun gaharu di kandang endur nya.

Ngenang kaul ke sama, Direktor Aquilaria Plantation(Sarawak) Sdn Bhd Dr Lim Chan Koon madah teh gaharu ngembuan mayuh pemaik ti manah ngagai pengerai tubuh.

Teh gaharu ku Dr Lim ulih ngurangka tikas gula dalam darah, mantu ngurangka kolestrol lalu nyeliahka kitai ari insomnia. — DayakDaily