Projek pemansang sektor minyak enggau gis tetap dipajakka — Abang Johari

Chief Minister Datuk Patinggi Abang Johari Tun Openg

KUCHING, Mei 16: Datuk Patinggi Abang Johari Tun Openg sehari tu madahka perintah negeri tetap neruska projek pemansang dalam sektor minyak enggau gis di negeri tu taja pan bisi ubah ba perintah renggat Perintah Besai.

Ku iya, sida deka berandau enggau Perintah Besai bekaul pekara nya, tang nganti maya ke engkeman.

“Awakka sida mutarka penanggul sida dulu.

“Kitai meseti lurus ati enggau sida. Sida agi kiruh enggau penanggul sida empu,” ku iya lebuh dikerandau pengudah Pengerami Betemu enggau Pemain Industri Minyak enggau Gis di Hotel Hilton ditu tadi.

Ku iya, perinrah negeri mega enda irau nyema perambu ungkup sektor ti udah dipesetuju sebedau tu enda diteruska Perintah Pakatan Harapan.

“Kitai semina nganti maya ke engkeman. Aku deka berandau enggau sida,” ku iya.

Sarawak diatu ngembuan kuasa penuh ngagai raban orang ti deka ngiga pemansut minyak enggau gis di negeri tu. — DayakDaily