Program ti dipejalaika CIDB mayuh meri pemaik ngagai raban nembiak

Baru disambut raban ari ABM Sarawak lebuh ke nemuai kereja kia, sehari tu tadi.

KUCHING, Okt 21: Program ti dipejalaika Lembaga Pembangunan Industri Pembinaan Malaysia (CIDB) nengah Akedemi Binaan Wilayah Sarawak (ABM), manah amat sereta mayuh meri peluang ngagai bala nembiak besemekih ba makit kereja ti majak mar dalam industri begaga, pia ku Menteri Kereja Raya, Baru Bian.

Iya bejaku munyi tu lebuh ke nemuai gawa ngagai ABM Sarawak ke diatur CIDB sehari tu tadi.

Ku iya, ABM udah muka lebih ari 100 bidang kompetensi begaga ungkup program nembiak enggau personel begaga.

Kelimpah ari nya, ABM mega bisi bejalaika program beratika kompetensi pengelandik enggau latih nitihka guna kus di ABM.

Entara kus pengelandik ti bisi dipejalaika di ABM baka Welding, Scaffold Erection, Plant Operation, Crane Operation, Electrical Installation, Gas Pipe Installation, Non Destructive Testing (NDT) enggau ke bukai.

Ku iya baru, penemuai nya mandangka perintah agi beratka pengawa ngemansang modal mensia dalam industri begaga dikena nentuka kompetensi pengelandik sereta nentuka industri nya ulih besemekih jemah ila.

Nyempulang iya lebuh ke nemuai kerja nya, Ketuai Sekretari OpisMenteri Kereja Raya Malaysia, Dato Dr Zohari Akob, Ketuai Eksekutif CIDB Dato Ir Ahmad Asri Abdul Hamid enggau Direktor CIDB Sarawak, Mohammad Merzan Hashim. — DayakDaily