Program nuchuk vaksin Anti-Rabies di Sibu berengkah kemari

SIBU, Jan 22: Opis Menterian Pengawa Berumah enggau Pengerai Mensia Mayuh Sarawak nagit nuchuk vaksin ‘anti rabies’ ngagai urung 10,000 iku ukui di Bagi Menua Sibu ba program vaksinasi anti rabies ti dipejalaika berengkah ari kemari.

Tuju program nya dikena nagang penyakit nyaari ngelekai ke Bagi Menua Sibu berindik ari kes rabies bisi ditemu positif ba ukui di Julau ujung taun nyin tadi.

Menteri Muda Pengawa Berumah enggau Pengerai Mensia Mayuh Dr Annuar Rapaee madah, tetiap tuchuk ke beungkus RM50 sigi betuju dikena nyaga ukui ari dirampit penyakit nya.

Laban ungkus nuchuk nya mar lalu semina semitan pengudah sebulan, pengempu ukui nya dilalau nentuka jelu ti dikesayauka sida nya dikuarantin pengudah dituchuk dikena nyeliahka dirampit nyema diserang ukui positif rabies.

“Siku ukui ulih bejalai sepenyauh 10 kilometer sehari lalu Julau enda jauh ari Sibu, nya kebuah kami ngaga program tu dikena meri imuninasi ngagai ukui ditu ke lalu terus nagang pengelekai penyakit nya,” ku iya madah ngagai pemberita pengudah datai ngemataka Tilawah Al-Quran renggat Bagi Menua Sibu di masjid An-Nur ditu malam kemari.

Dr Annuar madah, naka ke diatu oenyampau mensia parai ketegal setakat dirampit virus rabies di Sarawak mengkang lima iku lalu nadai kes baru ditemu ba mensia.

Ku iya baru, sambut ba hari keterubah ngagai program vaksinasi anti-rabies ti dipejalaika chara besai Opis Servis Veterinar Bagi Menua Sibu ke belabuh di Dewan Mayuhguna Sibu Jaya kemari beratika semina 197 iku ukui dituchuk.

Program nya deka dipejalaika ba 29 kandang endur di bagi menua nya lalu deka tembu ba kandang Taman Permai kena 1 Mac.

“Engka mensia mayuh enda nemu program tu bisi dipejalaika. Berengkang ari sehari tu (Hari Minggu) kami deka nyadung surat pemadah bekaul program vaksinasi anti-rabies tu dikena madah ngagai mensia mayuh ngambika sampal datai mai ukui sida awakka dituchuk vaksinasi anti-rabies,” ku iya.

Iya ngelalau pengempu ukui meri kerejasama ngagai program ngambika ulih nagang pengelekai virus nya. — DayakDaily